Abuuraas
sida ubaxa waaberiga
ama uduga saxansaxada
ku arko, markaan ku arko adigaa
jacaylku i abaaraayee
agagaarka beerka iyo
wadnaha layga adaaye
waa olol jacayloo
waa urugo kalgacale
Sahral
sida abriska iyo aarka
ayaan umalka iyo taaha
hadba aburka seydhaaye
Abuuraas
indhahaagu waa bodee
quruxdaadu waa ugubee
hablo kacay adduunyada
adaan kaa asdeystee
sideen kuu ilaabaayee
Sahra
sida hawd ugbaadkiisa
ama daalo aragooda
ku arko, markaan ku arko adigaa
jacaylku i abaaraayee
indhahayga caashaqa
ilmada lagu asqoobaayee
waa olol jacayloon
waa urugadaadee
Abuuraas
sida ubaxa iyo diinka
ayaan araga iyo muuqa
indhaha ugu furiyaayee
Sahra
waa adiga caashaquye
waa arami hawluhuye
waxa wiil arlada jira
adaan uurka ku hayaa
sidaan kuu iloobaayee
Abuuraas
sida ubadka iyo ehelka
ama aabe iyo curadka
ku arkoo, markaan ku arko adigaa
jacaylku i baaraayee
agagaarka beerka iyo
wadnaha layga adaaye
waa olol jacayloo
waa urugo kalgacale
Sahra
sida abriska iyo aarka
ayaan umalka iyo taaha
hadba aburka seydhaaye
Abuuraas
indhahaagu waa bodee
quruxdaadu waa ugubee
hablo kacay adduunyada
adaan kaa asdeystee
sideen kuu ilaabaayee
Sahra
sida ulaha dhabigeena
ama uduga yaaquudka
ku arko markaank u arko adigaa
jacaylku i baaraayee
indhahayga caashaqa
ilmada lagu asqoobaayee
waa olol jacayloon
waa urugadaadee
Abuuraas
sida ubaxa iyo diinka
ayaan araga iyo muuqa
indhaha ugu furiyaayee
Sahra
waa adiga caashaquye
waa arami hawluhuye
waxa wiil arlada jira
adaan uurka ku hayaa
sidaan kuu iloobaayee.