Ma og tahay Siraadey
Caashaqii na siray ee
Sahalka aynu moodnee
Ina saaqay gebigeen
Inuu soo kordhaayoo
Siigiyo dabayl iyo
Soo kiciyay cayryaan
Oon xalay saqdii dhexe
Hurdadii ka salaloon
Soo toosay dhowr jeer
Safaad male jacaylkuye
Waan sidaaye ila qabo
Soo dhawoo ila qabo
Oo haygu sii dayn
——————————
Ma ogtahay Siraadey
Saddex saniyo dheeraad
Intaa waan ku sugayoo
Nafta waan sasabayee
Berri bay si uun noqon
Saadambay wax kula qaban
Saadaasha geliyee
Sidaan fili jacaylkuna
Adi kuma sal gaarinoo
Waabad sahashanaysaa
Safaad male jacaylkuye
Waan sidaaye ila qabo
Soo dhawoo ila qabo
Oo haygu sii dayn
—————————
Ma ogtahay Siraadeey
Soomaliyoo idil
Uma sidatid quruxdee
Hablo kula sinmaa jira
Oonan saa u eegine
Waa su’aale kalidaa
Maxaan kaaga sahansaday
Sababtuna waxay tahay
Sambabadiyo beerkiyo
Wadnahaygad suran tahay
Safaad male jacaylkuye
Waan sidaaye ila qabo
Soo dhawoo ila qabo
Oo haygu sii dayn