Sow muraayad caashaqa
Mulkiyay uun manoqon
Sow muftaaxa kuma siin
Hoo imaamul kuma odhan
Sow maqalka dhagihiyo
Miirkaygi maad noqon
Mar hadaan ku waayana
Nafta sow ma huri karo
Sow muuqa sagalkiyo
Ma matashid ubaxoo
Sow carfta miskigiyo
Maanka kama udgoonid
Sow macaaanka noloshuba
Agjoogaaga maaha
Sow niyada maad degin
Qalbigayga maad hanan
Inuu jacaylku malabyahay
Hortaa maan ogsoonin
Hada Sida macalin
micnii Xiisa ii dhigay
Sow maariin dhalaal xiga
Midabkaagu maaha oo
Sow muunad gaara
Muxiboy umaad dhalan
Sow masuul naftaydana
Maantaba kamaad noqon
Inaan kuu mashxaradana
Sow mubaax maaha
In xiisuhu misbaaxyahay
Markhaati kama tihid
Masha alle caawaba
Soo maynu midoobin
Sow mudanahaygoow
Marwadaadi maan noqon
Sow maanta maad xulin
Masalahaaga maad dhigan